Sawal jawab
Jo dukandar aksar poochte hain.
Order kaise hota hai
Order karne ke kitne tareeqe hain?
Do. Subscription, jis mein aik baar plan lene ke baad rozana khana khud aata rehta hai. Aur apni marzi ka order, jis mein sirf jis din chahiye usi din ka order karte hain.
Apni marzi ka order kab tak kar sakte hain?
Aik din pehle, 7:00 shaam tak. Us ke baad ka order agle din ke liye chala jata hai. Ye is liye ke raat ko hi raste banate hain aur har kitchen ko us ka count bhejte hain.
Order karne ke baad pata kab chalega ke qabool hua?
Usi raat 7:30 shaam se 9:00 raat ke beech, WhatsApp par. Aisa kabhi nahi hoga ke aap ko subah tak intezar karna pare.
Order mana bhi ho sakta hai? Kyun?
Hum poori market ko aik chakkar mein cover karte hain. Isi wajah se rate sasta rehta hai aur market ke andar delivery free hai.Agar aap ka ilaqa hamare rozana ke raste par nahi hai, to aik akele box ke liye alag chakkar lagana na hamare liye chalta hai na aap ke liye sasta rehta hai.Is liye shaam ko hum dekhte hain ke us ilaqe se aur kitne order aaye. Kaafi order ho gaye to rider jayega aur aap ka order qabool. Nahi hue to hum saaf mazrat kar dete hain, aur aap ka koi paisa nahi lagta.Mana hone par aap ka koi paisa nahi lagta.
Subscription wale ko bhi rozana order karna parta hai?
Nahi. Aap ka khana rozana khud lag jata hai. Sirf us din batana hota hai jis din dukan band ho, aur wo bhi 10:30 subah se pehle.
Hafte ka menu kahan dekhein?
Subscription ka menu chaar hafte ki rotation par chalta hai, jo neeche poora likha hai. Apni marzi wale order ke liye har hafte alag menu lagta hai, jo sirf usi hafte ke liye hota hai. Wo hum WhatsApp par bhej dete hain.
Khana
MEALAWO ka matlab kya hai?
Meal yani khana, aur Lawo jo Gujrati mein laane ko kehte hain, magar izzat ke sath. Urdu mein us ki jagah hum “laiyay” ya “laain” kehte hain, is liye MEALAWO ka matlab hua “Meal Laiyay”. Hukum nahi, guzarish.
Khana kaun pakata hai?
Ghar ki khawateen, apne apne kitchen mein. Koi bara commercial kitchen nahi hai. Har kitchen mahine mein aik baar check hota hai, aur jis kitchen ki shikayatein barhne lagein us se pehle baat hoti hai, phir kaam kam kar diya jata hai.
Box mein kya kya aata hai?
Salan 300 se 350 gram, sath mein 2 roti, salad aur achar. Chawal wale din roti ki jagah 350 se 400 gram chawal aur raita. Beef wale din 3 se 4 piece, chicken wale din 2 piece. Ye wazan rozana wohi rehta hai, andaze se nahi jata.
Menu roz badalta hai?
Har din ka type pakka hai: Monday qeema, Tuesday daal, Wednesday chicken, Thursday sabzi, Friday beef, Saturday chawal. Dish har hafte alag hoti hai. 4 hafte mein 24 alag dishes hain, aik bhi repeat nahi. 4 hafte poore hone par pehle hafte se dobara shuru.
Hum beef nahi khate, ya koi cheez nahi khate to?
Bata dein. Us din ke liye hum sabzi ya daal wala box bhej dete hain, usi rate par. Order karte waqt likh dein, ya baad mein WhatsApp kar dein.
Khana pasand na aaye to?
Usi din bata dein. Agla box free. Aur wo shikayat hamare system mein us kitchen ke khilaf darj ho jati hai, taake baat wahin khatam na ho jaye.
Rate aur payment
Rate kya hai?
Dish ke hisaab se Rs 240 se Rs 390 tak, aik banday ka box. Lekin jitne log barhte hain, rate utna kam hota jata hai.2 par 3 percent, 3 par 5 percent, 4 par 7 percent, 5 par 9 percent. Aur mahana plan par 10 percent alag se. Apna rate khud nikal kar dekh lein.
Zyada logon par sasta kyun hota hai?
Kyun ke aap ki dukan par 1 box aaye ya 5, hamare rider ka chakkar aik hi lagta hai. Delivery ki wohi bachat hum aap ko rate mein wapas de dete hain. Khane ka kharcha to utna hi rehta hai, is liye discount aik had par ja kar ruk jata hai.
Payment kaise karni hai?
Cash, rider ko, dukan par. Har payment ki receipt number milti hai aur WhatsApp par tasdeeq bhi. Mahana package mein paisa shuru mein liya jata hai, isi liye mahana rate sab se sasta parta hai.
Delivery ka alag paisa lagta hai?
Jis market mein hum pehle se aate hain, wahan delivery bilkul free, chahe subscription ho ya aik din ka order. Baqi ilaqon mein area ke hisaab se kharcha lagta hai, aur wo aap ko order qabool hone ke waqt bataya jata hai, us se pehle nahi. Us ilaqe se kaafi order aane lagein to wahan bhi free ho jati hai.
Advance dena zaroori hai?
Nahi. Rozana bhi le sakte hain. Mahana package sasta zaroor parta hai, magar shart nahi hai. Aur sample to bilkul muft hai.
Waqt aur chhutti
Order kab tak karna hota hai?
Subah 10:30 tak. Us waqt khana pakna shuru ho jata hai aur har kitchen ko us ka count bhej diya jata hai. Baad ka order agle din chala jata hai.
Khana kab pohanchta hai?
12:30 se 2:30 ke beech. Aik market ka poora chakkar aik sath lagta hai.
Dukan band rakhni ho to?
Subah 10:30 se pehle bata dein. Us din ka khana nahi jayega aur aap ka plan aik din aage barh jayega. Paisa zaya nahi hota. Apne dashboard se khud bhi chhutti laga sakte hain.
Sunday?
Band. Ye jaan boojh kar hai. Jo khawateen pakati hain aur jo naujawan pohanchate hain, unhein bhi aik din aaram chahiye.
Shuru karna
Shuru kaise karein?
Apni tafseel bhej dein. Agle din hamara banda dukan par aayega, aik sample meal ke sath, muft. Us se agle din dobara aayega sirf ye poochne ke liye ke kaisa laga.
Kitne log honay chahiye?
Aik bhi kaafi hai. Zyada log honge to rate khud kam ho jayega, magar koi minimum nahi hai.
Beech mein chhorna ho to?
Bata dein, band kar denge. Jitne din ka khana nahi liya, us ka hisaab kar ke baqi wapas kar diya jata hai.
Hum bhi kitchen partner banna chahte hain, ya delivery ka kaam karna hai?
Rabta karein aur message mein likh dein. Ghar ki khawateen jo pakane ka kaam karna chahti hain, aur naujawan jo part time delivery karna chahte hain, dono ki hamein hamesha zaroorat rehti hai.
Aap ka sawal yahan nahi hai?