Kitchen partner
Aap ka hunar, aap ki apni kamai.
Jo khana aap rozana apne gharwalon ke liye banati hain, wohi khana bahar ke logon ko bhi chahiye. Farq sirf itna ke ab us ka mol milega.
Na ghar se bahar nikalna, na kisi ke saamne khara hona, na kisi ki minnat. Aap apne kitchen mein pakati hain, hamara banda darwaze se le jata hai, aur hisaab har hafte aap ke haath mein.
Kya milta hai
Saaf baat, koi shart nahi.
Ghar se bahar nahi
Sab kuch aap ke apne kitchen mein hota hai. Khana tayar ho jaye to hamara banda darwaze se le jata hai. Aap ko kahin jana nahi parta.
Har box ka apna rate
Jitne box banayengi, utni kamai. Rate pehle se tay hota hai, badalta nahi. Hisaab har hafte, poora, bina kaat kapat ke.
Subah ka waqt, bas
Khana subah 9 baje se pakna shuru, 11:30 tak tayar. Baqi din aap ka apna. Sunday poori chhutti.
Kaam pakka milta hai
Aik raat pehle bata diya jata hai ke kal kitne box banane hain. Wo count pakka hota hai. Subah aa kar hum ginti nahi badalte.
Saman ki fikr nahi
Raw material ka intezam mil kar hota hai. Aap ko apni jaib se saman khareed kar intezar nahi karna parta ke paisa kab aayega.
Koi fees nahi
Shamil hone ka koi paisa nahi. Na security, na advance. Agar koi aap se paisa mange to wo hamari taraf se nahi hai.
Hamein kya chahiye
Bas teen baatein.
- 1
Khana acha bane
Wohi jo aap rozana banati hain. Koi hotel wala style nahi chahiye, ghar ka zaiqa hi hamari pehchan hai.
- 2
Safai poori ho
Saaf kitchen, saaf bartan, dhoye hue haath, baal dhake hue. Mahine mein aik baar hamari khatoon aa kar kitchen dekh leti hain. Ye har partner ke liye barabar hai.
- 3
Waqt ka khayal ho
Jo count raat ko tay ho, subah wohi tayar mile, 11:30 tak. Kabhi na ho sake to raat ko hi bata dein, koi baat nahi.
Jo sawal aksar aate hain
Pehle hi jawab de deti hain.
- Ghar walon ko bataye baghair ho sakta hai?
- Hum ghar walon ki marzi ke baghair kaam shuru nahi karte. Ye ghar mein hone wala kaam hai, is liye ghar ka razi hona zaroori hai. Baat karne mein hum aap ki madad kar sakte hain.
- Bara kitchen ya nayi cheezein chahiye?
- Nahi. Jo degchi, chulha aur bartan aap ke ghar mein pehle se hain, wohi kaafi hain. Packing ke box hum dete hain.
- Rozana kitne box banane parte hain?
- Jitne aap keh dein. Koi 15 se shuru karti hain, koi 40 tak jati hain. Aap se poocha jayega, aap par thopa nahi jayega.
- Kisi din na bana sakein to?
- Raat ko bata dein, us din aap ka naam nahi lagega. Bimari, mehmaan, koi bhi wajah ho, poochenge nahi.
- Paisa kab milta hai?
- Har hafte. Kitne box banaye, kitna bana, sab likha hua aap ke apne screen par nazar aata hai. Andaza nahi lagana parta.
Darkhwast
Apni tafseel bhej dein.
Aik minute ka kaam. Hamari team do din ke andar aap se baat karegi. Chahein to aap ka koi ghar wala baat kar le, us mein bhi koi harj nahi.